【盘房来料】汽车股业绩强差人意放大图片

呢头侵侵先一再强调中美贸易协议进度理想,嗰头又有外电指中美双方下月係唔会签署首阶段贸易协议,阿妈,我好乱呀……不过呢个外电就搞到中港两地股市应声而下,喺结算日嘅上半场,恒指一度跌逾百点。

恒指低开19点,虽然开市冇耐曾倒升22点,见过26809点半日高位,但其后又再回落,最多跌161点,见26625点半日低位。不过穿咗10日线(约26750)后又见买盘趁低吸纳,令跌幅收窄。中午恒指报收26717点,跌69点;国指则跌39点,报收10507点。

咪以为个市有啲脚软,腾讯(00700)一定跌,今日腾讯就先跌回升,不过一日股价唔上番320元楼上都係湿滞。至于大笨象(00005)股价续跌;友邦(01299)、平保(02318)都难逃一跌。蓝筹之中以国寿(02628)表现最好,由于业绩好过预期,半日升逾3%。

讲咗N咁多次,阿Man对汽车股戒心大,炒作短瘾,炒一日半日又无影,食少多教训,宁愿睇少一瓣。比亚迪(01211)第三季纯利大幅倒退近九成,被大行削目标价唱淡,股价半日跌6%。广汽(02238)第三季少赚52%,股价半日跌4.2%,而早两日係威係势嘅其他汽车股,全部难逃一跌。话咗呢个板块业绩难寄厚望,早前销售数字有改善,都只係之前基数较低,业绩一出又见真章,讲到底呢个板块都係避之则吉。

阿Man今年除咗睇好物管股跟医药股两大板块之外,内需股亦係其中一个不时有推介嘅板块,记得年初时曾力推安踏(02020),喺公司被沽空机构狙击之际仍未动摇,表示真金不怕洪炉火,股价被狙击急挫係上车好机会,结果安踏亦不负所望,股价屡创新高,已远超当时阿Man所订下嘅目标价。今日安踏再因为向国际奥委会供官方服装,股价半日再升3.2%,当然又係创新高。而另一体品股李宁(02331)走势同样维持靓仔样,不妨望多两眼。

至于阿Man上周曾推介嘅冷门5G概念股艾伯科技(02708),已顺利升抵3元目标价,呢个星期开始进行整固,若然上次错过咗,不妨吼股价整固回调搵个位上番车,暂时其股价喺2.7至2.8应该有唔错支持,要翻兜或者上车,不妨吼住2.8元附近,若然跌穿2.6元就止蚀唔使谂,估计搞得5G咁大坛嘢,无理由炒两日玩完咁短瘾。

麦狄文
(徐狄怡‧证监会持牌人)

您也可能喜歡這些文章