【盘房来料】港股乏利好消息支持继续反弹放大图片

中美贸易关係前景仍充满变数,本港局势发展亦受到市场关注,港股较早前反弹后靠稳,今早再受压,二万六关再受考验。恒指高开2点,虽然曾升18点,见过26288点半日高位,其后沽压涌现,最多跌261点,见过半日低位26008点。恒指中午报收26040点,跌229点;国指跌51点,中午报收10125点。

恒指险守二万六关,重磅蓝筹股乏善可陈,建行(00939)半日逆市升0.3%,其他重磅股大部份偏软,腾讯(00700)跌0.1%算硬净,不过335至340呢个阻力证明好难突破,暂时腾讯就喺250日线附近争持。至于明日派成绩表嘅友邦(01299)半日跌1.6%;大笨象(00005)跌0.6%;平保(02318)、工行(01398)等全部脚软,无一倖免。至于已派成绩表嘅煤气(00003)不仅业绩倒退,亦有可能减少派息,大行调低其目标价,而阿Man亦有提到,煤气短线沽压唔细,家下已跌到落250日线,未知呢个位顶唔顶得住,一旦失守15楼下见。

平静咗两三日嘅香港,隔晚又再喺元朗发生警民冲突,再次令缸边友担心政治情况未能改善之余,更加係每况愈下之势,拖累陀地地产股普遍下跌。恒地(00012)公布业嫧大幅倒退,同时公布出售元朗跟和生围地皮,喺呢个敏感时刻,出售敏感地带地皮,确有点耐人寻味,投资者摸不着头脑,唯有先沽货离场,股价半日跌3.7%,蓝筹之中跌幅最大。其他本地地产股全线下跌,其实唔少地产股现价估值已唔算贵,至少相对仍然高企嘅楼价,地产股股价唔单止合理,更可以算超值。可惜本港前景充斥住不明朗因素,再平嘅本地地产股,暂时仍乏人问津。

汽车股逆市做好,吉利汽车(00175)派完成绩表,有大行唱好, 股价半日升逾半成,蓝筹之中跑第一,连带其他汽车股做好。不过阿Man都係嗰句,汽车股近呢一年以嚟,次次落镬都相当短瘾,小心高追又中伏。

暂时唔见得有乜嘢利好消息可以支撑港股再向上反弹,虽然联储局上月会议纪录已暗示下月减息机会高,可惜港股未能受惠呢个消息向上,睇嚟港股暂时都係继续喺25800至26300点之间上落。

您也可能喜歡這些文章