【盘房来料】港股二万七关前要整固放大图片

美企继续公布业绩,大部份都交足功课,不过中美贸易谈判仍存变数,美股表现较为反覆。至于香港呢边就反覆偏软,陀地地产股急升过后见回吐,拖累指数回落。加上内地公布第三季GDP增速创27年新低,只有6%,令港股高开低走。

恒指高开62点后,一度升幅扩大至136点,见过半日高位26985点,创9月16日以嚟逾一个月高位,不过二万七呢一关唔係话过就过,结果越关不成就掉头向下,曾倒跌72点,见过半日低位26776点。其后跌幅收窄,中午恒指报收26824点,跌24点;国指中午报收10592点,升3点。大市成交淡静,半日不足400亿元。

腾讯(00700)升0.5%,暂时都係咁上下,其他重磅蓝筹股个别发展,大笨象(00005)又传裁员,不过就烧唔到香港呢一边,股价半日微跌0.16%,仲企稳60元楼上。地产股连升个半交易日后,今日见回吐,不过相对呢两日升幅,回吐幅度好有限,估计喺新楼按政策下,本港楼市气氛将有改善,有助发展商推新盘。

地产股回气,资金另觅出路,转炒医药股,呢个板块长炒长有,阿Man都话每次回吐就係低吸好机会。石药(01093)半日升3.5%,係升幅最大蓝筹股,其他医药股普遍录得2%或以上升幅。

另一个阿Man爱不释手嘅板块,就係一直未受贸易战影响嘅物管股,虽然中美贸易谈判有进展嘅时候,呢个板块曾被冷落,但今日板块多只股份再度寻顶。其实升破咗高位,就係进入无障碍通道,之前回吐稍作整固,又可以再创新高。值得留意中海物业(02669)已平上市新高,半日升近半成,当然可以更上一层楼。其他物管股都有理想表现,只有碧桂园(06098)半日倒跌。

之前阿Man推介嘅平安好医生(01833)已顺利升抵60元目标价,继续持货与否自己决定,不过阿Man就开始转移视线睇住另一只新经济股阅文集团(00772),今佢现价距高位仲有大把水位,加上股价喺25元附近成功寻底,完成整固后,近日再展升浪。日前成功回补于8月13日所遗下嘅下跌裂口重上30元水平,只要企稳喺30元楼上,守住多条移动平均线之上,下一个目标自然就係向住250日线,即35元水平出发。集团跟迪士尼中国达成合作协议,双方共同公布,星球大战系列中文电子书于阅文旗下数字阅读平台首次亮相,係迪士尼首次在国内开放星战小说嘅电子版权。泊得到迪士尼呢个大码头,星战小说电子版只係个开始,迪士尼咁多经典故事,食住呢条水,阅文肯定有钱途。

麦狄文
(徐狄怡‧证监会持牌人)

您也可能喜歡這些文章