【盘房来料】港股二万六好淡争持放大图片

隔晚美股跌到一仆一碌,主要係美国9月ISM製造业指数创逾十年新低,三大指数跌逾1%。而港股隔晚喺ADR及新加玻黑期亦受拖累下挫,26000水平得而复失,不过今早港股又死唔去,早段曾跌逾300点后,26000点成功收复。
恒指低开190点后,最多跌314点,见25778点为9月4日以嚟新低。其后跌幅收窄至68点,见过半日高位26024点。中午报收26022点,跌69点;国指则报收10187点,跌13点。

重磅股个别发展,表现较佳竟然係陀地地产股,整个板块先低后高,新世界(00017)升2%,其他地产股升幅亦超过0.5%,估唔到噚日香港发生咁大件事,多个大型商场关闭,全港主要运输系统地铁(00066)更关闭超过40个站,本地地产股可以无穿无烂,都算係另类平行时空。至于今日将派成绩表嘅大笨象(00005)跟恒生(00011)则跌逾1%,大笨象失守60元,睇嚟份成绩表唔慌有惊喜。加上隔晚10年期美债息急跌,其他本地银行股同样下跌。

重中之中嘅腾讯(00700)半日跌1.4%,睇款好大机会短期再试320元支持位。港交所(00388)自提出收购伦交所后,股价表现一落千仗,虽然上周开始见反弹,但今日无以为继。其他重磅股唔见得有几本事,睇嚟26000都要苦苦争持。

内需股承接假期前强势,今日继续做好,周一刚上市嘅新打百威亚太(01876),首日上市已令人另眼相看。周一收市后恒指服务公司宣布将其纳入恒生综合指数及恒生消费品製造及服务业指数,并于本月16日起生效。由于百威嘅晒士庞大,未来更有机会晋身指数成份股,追蹤指数嘅基金需要被动性买入,难怪百威虽然派到人人有份,股价首日上升后,今日仍有后劲。由于百威以下限价27元上市,呢一转就先以其招股範围上限,即30元作为目标价。

医药股个别发展,不过阿Man一向对呢个板块锺情,即使受政策影响,长远嚟讲经过改革后,龙头企业个别药品抢佔更大市场后,继续有钱途。值得一提係唔係直接做研发药物嘅方达(01521)逆市创新高,破顶股唔估顶,加上方达晒士唔算大,应该仲有得炒作。

麦狄文
(徐狄怡‧证监会持牌人)

您也可能喜歡這些文章